دسمان السبيعي و حسين بن معوضه في مجاره رائعه لاتفوتكم تكفون

[مراااحب]

الشاعر حسين بن معوضه ال ملهي الحبابي اطلع علي ابيات
الشاعر دسمان بن مناحي السبيعي حيث قال دسمان هذه الابيات التاليه ومناسبتها :-
ان والد الشاعر دسمان بن مناحي السبيعي مريض علي اثر جلطه افقدته قدره النطق والحركه ظل حبيس السرير منذو فتره طويله والمعروف انه واحد من الرجال الذين اصيبوا في موقعه من مواقع الملك عبدالعزيز رحمه الله بالجنوب00
قلنا فقد القدره علي النطق وذات ليله نطق باسم ابنه دسمان في نداء اخواه المرض والضعف قال دسمان

لبيـك لبيـك ياصـوت يناديـنـي
لبيك من بـده القاصيـن والدانـي
لبيـك لبيـك مـن قلبـي ملايينـي
لبيـك لبيـك ثـم لبيـك بلسانـي
ماهوب لبيـك ياصـوت المزايينـي
لبيك ياصوت ابويـه يـوم نادانـي
كفي لك فراش ولحافك هدب عينـي
مادام انا حـي تامرنـي وتنهانـي
يابوي مافيه شـى عنـك يلهينـي
طاعتك من طاعه اللي سن الاحساني
ان مت قبلي بكيتك ليـن توحينـي
وان مت قبلك فلا تبكي علي شانـي

وبعد هذه الابيات السابقه جاره الشاعر حسين بن معوضه الحبابي قبل وفاه والديهما رحمه الله رحم واسعه


دسمان وايش فيك بابياتـك تبكينـي
ما كل ماسمعـت يادسمـان بكانـي
حتي لو ابكيتنـي هرجـك يسلينـي
دسمان دسم علي اسمك هرج سماني
الله يسامحـك يـازبـن المخليـنـي
حتي لو ابكيتنـي ياطيـر حورانـي
ذكرتني واحد لـي رحـت يدعينـي
يقولـي ودي انـك دائـم اوزانــي
وان كان غبـت يادسمـان يومينـي
جيته وقلبه علـي القـرم شفقانـي
وان غبت عنه لكنـك شائـف فينـي
خله وقلبي خطيـر يصيبـه جنانـي
دسمان يفدونك اللي حظهـم شينـي
الكـل منهـم يخلـي بـوه بالعانـي
شيبانهـم بالخـلا دائـم مخليـنـي
ندعي لهم دايـم بالمـوت عزرانـي
متكبريـن بـلاش وهـم مساكينـي
وان قلت غلطان قال الا انت غلطاني
ومودع امـه ردي الحـظ عامينـي
يقول تزعج عيالـي هـم وجيرانـي
الين ماتـت وجـاه العلـم بعدينـي
خسران ياجاحد المعـروف خسرانـي
ناس علي الحقد والبغضـا مربينـي
دائم تغيض الرفيق وتشتـم العانـي
في ذمتي مالهـم مذهـب ولادينـي
البعد عنهـم تـراه يجلـي احزانـي
ياعين يرزقـك سلطـان السلاطينـي
عن رفقـه افـلان وافـلان وفلانـي
عليك باللي مثـل دسمـان ياعينـي
قصيده العذب يشرح صـر الانسانـي
دسمان لاهنت جعل ايامـك سنينـي
حبيت اجاريك لو ماهـي بتنصانـي
ياليت دسمان مـن ربعـي الادنينـي
ان اشهد ان رفقته تشري بالاثمانـي
لاشـك ذي حاجـه ماهـي بيـدنـي
هو من سبيع وحن من روس قحطاني
والختم ياعين كفي الدمـع تكيفينـي
لابد وان ماوطـا دسمـان ياطانـي
الغيب عنـد الله عـدال الموازينـي
وصلوا علي سيد خلقه نسل عدنانـي

وصلت المجاراه للشاعر دسمان السبيعي بعد وفاه والده ورد علي المجاره بهذا القصيده

ياحسين بعد البطاء وش بك تجاريني
تنبش جروح الزمان اللـي تحدانـي
وانا عن مجاريات الناس يا حسيني
يكفيني اللي من أسباب الدهر جانـي
مع قوعزمي ربع ما صـار يكفينـي
والخافي أعظم من اللي للعرب باني
ألاوي الوقـت ويدينـه تـلا وينـي
والأول من الثنين اقوى من الثانـي
يابعد فرق التكافـي بيـن الاثنينـي
شتان بين الزمان وبيـن الانسانـي
مرحوم ياللي عليك ملبـد الطينـي
يسقي ضريحك من الهمتال ودانـي
والله إن أكفن وحبك فـي شرايينـي
حاويه قلب يضخه وسـط شريانـي
اختارك الله وكـل الخلـق فانيينـي
هذا القدر والجزع نقـص الايمانـي
وانا عن مكابـد الفرقـاء يعزينـي
صبـرا جميـل ودعـوات بغفرانـي
ياحسين يامقدم الربـع الكريمينـي
يانجل شيخ يعز الضيـف والعانـي
البر ياحسين وقت العسـر واللينـي
في والدينـك مثـل ماقـال لقمانـي
خلك لهم غيث ورجـوع وبساتينـي
واخفض لهم من رقيق الذل جنحاني
ياحسين مادامهم ياحسيـن حيينـي
فرصه ترى العمر يافرز الوغاء فاني
لاتمسي إلاوهم ياحسيـن راضينـي
كانك تبي جنة الفردوس مسكتانـي
اللي يقصر بهم مـا فالـه بزينـي
حتى لونـه يذبـح عقـر الضانـي
هذاك دينه وديـن اسحـاق رابينـي
خسران دنيا ويوم الحشر خسرانـي
مـا تنوصـي ومثلـك لويوصينـي
شلته من المقدريه فـوق الأمتانـي
خابرك ياحسين من روس القحاطيني
وانا بعد مثلكم مـن روس سبعانـي
وان كان ودك مع الطرقة تخاوينـي
يامرحبا بالعديـم إن كـان خاؤانـي
أنشد وتلقا مـع الطيـب عناوينـي
مثل ابن زامل معه رقمي وعنوانـي
وألإما دام اليمامـة بينـك وبينـي
في كل ميدان تجمع بيـن الأخوانـي

[ابو عمر]

مشكووووور اخوي مراحب

[مراااحب]

شكرا على المرور اخي ابو عمر

[دواس]

القصائد رائعه